【運動藝人專訪系列】運動助清晰目標堅持追夢 葉泓聲不忘舞動初心

前組合「天堂鳥」隊長葉泓聲（Gordon）近年成為獨立歌手，失去公司作後盾，他坦言要自負盈虧，雖然贏輸未知，但成功會更有成就感。Gordon自小因熱愛運動而能訂立清晰目標，最終如願成為舞蹈員。如今，他希望繼續為舞蹈界出一分力，趁年輕多跳舞，並透過快歌演繹更多舞蹈作品。至於其好友王嘉爾（Jackson）成功站上國際舞台，也激勵Gordon力爭上游。●香港文匯報記者 梁靜儀

去年跟唱片公司完約的Gordon，現轉型成為獨立歌手，他表示雙方是和平分手，又很多謝前老闆多年來在其身上投資了很多，希望日後做出成績雙方可再合作。沒有了唱片公司作後盾，Gordon直言已有心理準備要自負盈虧：「贏輸都係自己嘅話，贏就成就感大啲，所以都好努力搵贊助。」輸贏仍是未知之數，Gordon之所以決意要做音樂，最大原因是希望為跳舞界做點事：「趁自己仲後生仲跳得之時，就跳多啲舞，𠵱家越來越少跳舞歌，快歌都冇。除咗MIRROR，真係少之又少，自己雖然未必有好大能力，都希望為跳舞界做啲事，始終自己做dancer出身，希望演繹多啲舞蹈畀大家睇。」入行前曾跟朋友合資開過舞蹈學校的他，直言並不享受教跳舞，但很樂意跟大家分享經驗。

Gordon表示他熱愛運動，喜歡打籃球、足球、排球、欖球及游泳，現時更是香港明星足球隊成員之一。他認為運動除了可帶來開心外，還可令頭腦清醒：「做運動時令到我嘅目標更加清晰，所以好細個已定好晒點樣行，就係做舞蹈員。因為我偶像係郭富城，18歲要去紅館跳舞，托賴，成功咗。」

Gordon從小已是運動高手，尤其是田徑運動，他笑說：「實不相瞞，我中學時期係跨欄高手，呢個項目為我帶來好多獎項，當時讀本地學校，聯校去澳門比賽，贏咗個金牌，原本我以為去唔到聯校比賽，因為曾經試過大家都視我為大熱，結果跨欄比賽時跌咗兩次，有時比賽得意之處，就係你好有信心、係大熱，但會大熱倒灶。」就像他的演藝生涯，經歷多次起起跌跌。

團隊運動洩負面情緒

出道快將12年，Gordon承認做娛樂圈的壓力很大：「基本上係冇一個平衡位，紅有好大壓力，唔紅都有無形壓力，所以好多藝人做運動，散發負能量。」不過他的心態很正面，認為凡事總有兩面，很多時候的不愉快都是自己想出來，不快時他會找人分享，所以他最喜歡做團隊運動發洩負面情緒。他指運動帶來的好處非常多，不單對健康有益，身手亦會較靈活，他亦鼓勵子女多做運動，又會跟十歲大女Aria一起跑步，增加親子樂。

他亦透露其父同樣愛運動，早年兩父子經常一齊打保齡球，而其父更曾參加馬拉松跑「全馬」：「十幾年前，爹哋會跑全馬，我自問做唔到，他𠵱家年紀開始大先冇跑。」雖然自己未能跑全馬，但Gordon有參加馬拉松的十公里賽事。他笑言早起有一定難度，以前他早上湊女返學後會回家補眠，但最近他會趁有3個小時空閒去做gym，精神變好了，連帶夜睡的習慣都改善了，他笑說：「要多謝我個女。」

36歲的Gordon於2023年迎娶前女子組合Freeze成員陳樂榣後，兩人同年誕下女兒Gia，去年再誕下細仔，湊成「好」字，而Gordon亦一向對繼女Aria愛護有加，組成一家五口家庭，相當幸福，這亦令Gordon更積極投入工作。

無懼被指叨王嘉爾光

早前國際紅星Jackson於澳門舉行演唱會，Gordon亦有前往捧場，令二人的關係曝光，原來二人識於微時，是美國國際學校的校友，十多歲已一起跳舞。Gordon更希望可以跟老友Jackson同台演出。問到合作進展如何？Gordon不諱言自己要有更大知名度才合作：「未咁快，未夠膽，希望自己做返啲成績先，佢始終係國際巨星。（合唱？）如果合唱，我希望自己有返咁上下地位先合作，自己會舒服啲。（唔想畀人話你叨光？）其實𠵱家都有人話我靠黐，天王巨星唔黐，黐邊個呀？同埋Jackson都唔介意，大家又介意啲咩先？ （以對方為目標？）佢真係好勁，做好自己先。」