香港文匯報訊 藝人黃嘉樂前晚突然宣布離巢TVB，與公司結束21年的賓主關係，他在社交網上發文表示：「感謝這二十一年伴我成長的一切，所有遇上的人和事都是我最好的收穫。跳出舒適圈，尋找更多機遇，迎接未來更多挑戰，期待一個全新的自己！」圈中好友黃翠如、趙希洛等也留言表示支持。

黃嘉樂回應香港文匯報時剖白說：「首先真係好多謝公司、監製等等畀機會我拍《法言人》，經過二十年終於可以擔正，喺自己成長嘅地方做到呢一次主角，真係好感恩，好感謝畀機會我嘅人。離開公司就當然好唔捨得啦，我真係喺呢度入行，喺呢度成長，好多感情。發展方面，現在我過咗四十歲，又成家立室咗，自己好想有啲改變，始終一直我哋喺公司嘅身份比較被動，𠵱家可以試下唔同嘅野，咁多年除咗拍劇，好似冇畀機會自己睇下其他嘢，睇下出面發生緊乜嘢。現在我覺得係一個好好嘅契機，其實真係乜嘢都想試。」

對於今次的重大決定，嘉樂當然有與太太商量，他表示：「太太好支持我每一個決定，我太太話『最緊要我開心』。其實即使將來同TVB都可以用唔同方式合作，只係自己想睇下出面有咩嘢可以嘗試同挑戰。」

黃嘉樂入行至今拍了超過40套劇集，年過40歲的他愈見成熟有型，演技也大躍進，正反角色丶古裝時裝都可以，形象正面，可惜欠缺些運氣，多演配角或閒角，直到最近才正式擔正演劇集《法言人》。黃嘉樂今年8月成家立室，當然希望有機會搏殺，可惜多年來公司給的機會太少，不出外闖一下確實難服氣，希望他早日遇上伯樂！