香港文匯報訊（記者 梁靜儀）王祖藍主持的無綫綜藝節目《有個閨密叫祖藍》，前晚（7日）播出第二集，嘉賓胡杏兒除了以對戰形式與Mike（曾比特）合唱《現代愛情故事》，還獻唱了老公喜歡的《千言萬語》，杏兒笑指大仔一歲時聽她唱這歌時聽到落淚，不知是否她唱得難聽。

二人在另一嘉賓Mike主持的「閨密任務之問答環節」中，又齊齊回顧處女及處男大碟趣事；祖藍笑指自己當年的「偽林峯」Image好難頂：「當年我同林峯同一間唱片公司，我都好奇怪，佢哋整長咗我對腳，又磨咗我啲皮，真係當咗我係林峯咁Sell。」杏兒對於祖藍當年比現在瘦足幾個碼，亦嘖嘖稱奇。

之後杏兒與祖藍轉戰廚房陣地，杏兒煮碗仔翅，祖藍主攻咖喱魚蛋，祖藍對杏兒手勢讚口不絕，對此杏兒笑言有想過退休後賣碗仔翅，祖藍聞言即舉腳贊成。二人邊食邊玩「Truth or Dare」，杏兒被問到「最驚收到邊個TVB藝人朋友嘅電話」等。杏兒相當頭痛，祖藍竟想到拉「負評王」李思捷落水謂：「有冇討厭嘅人？李思捷嗰啲呢？」杏兒聞言即開懷大笑，並說：「佢唔會打電話畀我。」

問到「最差一次接吻戲經驗」時，杏兒說：「記得係拍《當狗愛上貓》，嗰場戲其實冇乜嘢，但我唔知係個胃唔舒服定點，咀完之後我當場嘔。」當時對手為黃浩然。談到最不滿意一套劇集時，杏兒直言是《衝上雲霄1》，她說：「因為算係第一次戲份咁重，我嗰時真係唔知自己做緊乜，因為第一次覺得自己要有角色嘅鋪排，我覺得好迷惘同好驚，所以永遠回望返都覺得自己可以做得更好。」