香港文匯報訊（記者 梁靜儀）陶大宇早前因以「水撥式台風」演唱《倒轉地球》而人氣急升，近日他接受香港電台第一台《舊日的足跡》主持車淑梅訪問，大談其演戲生涯及近況。

入行39年，大宇當年主演的電視劇《壹號皇庭》、《刑事偵緝檔案》等都錄得超過40點收視，非常受歡迎，更有「師奶殺手」這個稱號，原來當初他並不太習慣。他笑稱當時自己還後生，應該是「少女殺手」才對，後來他也漸漸習慣了「師奶殺手」這個綽號。

提到好友黎耀祥 (祥仔）最近不時在訪問中提起自己，他說要多謝祥仔：「我哋感情非常好，拍《影城大亨》嗰陣，因劇集有六十幾集，拍成 8、9 個月，日日對住，（我哋）感情開始建立。」大宇又再次澄清自己不是祥仔的大恩人，又讚祥仔念舊：「我並唔係乜嘢大恩人，佢有同我分享買樓嘅事，（請佢去內地登台）完全唔係因為供樓原因，主因係我哋拍完劇唔捨得對方，我想用工作去延續我哋嘅友誼。佢好念舊，我記得好耐之前，我地喺酒樓合作做騷，我做司儀同唱歌，佢扮羅記，我送咗一條熒光綠嘅呔畀佢，好妖咁做表演。好多年之後，我睇電視訪問，佢依然講起嗰條呔，仲keep到現在，佢真係好念舊。佢做三次視帝我覺得都唔夠呀，佢除咗苦盡甘來之外，再加上自己努力，大家見到佢嘅成就，第一件事唔使講，拍咗手掌先！我哋好好感情，雖然最近見面少咗，但都好留意對方！」

稱TVB未有邀拍劇

談到演戲生涯，大宇表示在1997年離開 TVB 後，電視台才有視帝等獎項，如果他在其他人心中已屬這個位置，他非常感激。之前有傳陶大宇會客串 TVB的處境劇，他否認道：「暫時未有收到邀請，若然收到邀請，時間上能配合，劇情又惹笑的話，不排除這個可能性。」

談到現時的電視台小生，陶大宇認為洪永城是可造之才，只要他多拍劇，假以時日一定有成就；另外他亦欣賞余德丞，認為待他更成熟一定可以發圍，成為新一代「師奶殺手」；花旦方面，他就看好視后蔡思貝，認為她以往演戲比較「飄」，現在演得穩固扎實，進步得很快。

疫情之下，演藝人員也受影響，大宇也是其中之一，他說：「入行幾十年，最難過是去年在疫情下，（我）曾經有9個月坐喺度，藝人要喺工作裏爭取優越感，無論大事定係小事，我都有一個宗旨，小事當大事做。冇工作時好痛苦，我靠煮飯、運動度日，心情好負面，買餸都唔開心，再冇心情去街市打牙骹，全情苦口苦面，買完即走，直至疫情稍為穩定我先決定再北上工作。入行39年我依然可以喺跑道上跑，證明自己無入錯行，仲做緊自己鍾意做嘅嘢。」