香港文匯報訊（記者 梁靜儀）江海迦（AGA）、Gin Lee（李幸倪）及鄭融等歌手昨日出席《香港金曲頒獎典禮 2021/2022》記者會，提到AGA和Gin Lee在剛過去的兩個樂壇頒獎禮中均「捧蛋」，Gin Lee坦言作為歌手，有獎是對歌手一個肯定，是開心事，都寄望之後的頒獎禮。AGA則認為獎項是由別人給予，不論有沒有獎也會繼續為廣東歌努力。

「星夢娛樂」歌手胡鴻鈞（Hubert）與菊梓喬（Hana）去年在 《勁歌金曲頒獎典禮》分別得「最受歡迎男歌星、女歌星」，Hana更是第3度獲「最受歡迎女歌星」，問到對無綫和港台合辦頒獎禮，可擔心因競爭大而少了獎項？Hana說：「夠啦，（可想再蟬聯？）蟬聯3屆已好滿足。」

Hubert就稱最重要是多人參與，對歌手及Fans都是好事，今次兩間機構首次合辦頒獎禮，已行出了第一步，將香港音樂團結是重點，得獎與否已不是重點。問到不想得獎嗎？他笑說：「應該冇人唔想得獎，對蟬聯都係抱平常心，我睇好張敬軒。」Hana亦稱睇好張敬軒，而女歌手方面，覺得有很多位都好犀利。

吳業坤（坤哥）和姚焯菲（Chantel）昨日於頒獎禮記者會上碰頭，兩人更有合照，不過坤哥就儼如小Fans，表現頗為拘謹。說到當日Chantel參加比賽時，坤哥曾揚言要做她的歌迷會會長，不過坤哥昨日就改口說：「我係鍾意聽佢唱歌嘅粉絲，之前講話做佢歌迷會會長，我自己都覺吹大咗，唔做會長喇，都係做歌迷算啦，我有聽佢嘅歌，真係欣賞，但唔想大家誤會我係『怪叔叔』，之前喺頒獎禮後台見到Chantel爸爸，我哋都有傾偈，作為成年人都有責任話返畀佢爸爸知，我唔係咁樣嘅，等佢安心啲，我哋見到面有互相打招呼，（姚爸爸有冇叫你遠離佢個女？）絕對冇，仲問返我使唔使同Chantel合照，佢好nice。」問到會否想與Chantel合唱？坤哥說：「留返Chantel發展個人音樂先，等佢識得選擇先，相信佢都大把選擇，我純粹做一個歌迷已好滿足。」提到港台和無綫聯合舉行頒獎禮，坤哥表示好開心：「我接受訪問都好興奮可以拎起其他電視台嘅咪牌，感覺終於好似打開咗缺口，好希望將來可以去到更多唔同平台唱歌，我有主動同公司講想上唔同平台唱歌，作為歌手，當然愈多平台愈好。」

張天賦強調保持單身

Chantel表示第一年參加音樂頒獎禮，在現場見到好多來自不同唱片公司的歌手都感到高興，她又直言以往無睇過《勁歌金曲》，因為小時都是睇卡通片多。問到她對新人獎可有期望？Chantel表示順其自然。至於可想跟其他平台的歌手合作？她直言暫時希望先跟聲夢學員合作。

華納歌手MC（張天賦）對於兩台合辦頒獎禮感覺很新鮮，之前在其他頒獎禮上得到新人獎的他，坦言對得獎有信心，他說：「我對自己同公司有信心，都想再接再厲。」談到他近日與已婚歌唱參賽者Ash（鍾卓穎）被拍到平安夜逛超市，因而爆出緋聞，而被指背夫出軌的Ash近日更自爆已跟老公離婚，事後MC所屬的華納唱片回應指二人只是純粹工作朋友關係。

昨日MC出席記者會時，再次解釋與Ash只是普通工作朋友的關係，不是私下相約出來，MC稱不清楚對方與老公的事，亦沒有過問。至於與Ash可有發展機會？MC說：「拍MV時，對方有請教我，我有睇過佢少少唱歌片段，但拍拖就未考慮住，若然拍拖會同大家宣布，呢一刻我係單身。」