●事主展示「欠單」,指控黃店「牧活咖啡餐室」懷疑拖糧。 fb截圖

黃店鍾意掠水就大家都知,但連人工都唔出就真係好過分。有網民日前喺facebook發帖稱,自己喺旺角黃店「牧活咖啡餐室」做咗一個半月,該店「唔俾(畀)僱員合約人簽,一直系(係)咁拖糧」,最後話會分兩期出糧,但一期都無出過,苦主只好將事件交由勞工處跟進。事件引起網民熱議,有人認為事件「同蘋果汁一樣」,寸埋《蘋果日報》執笠後依然拖欠員工薪金,再次印證「黃色經濟圈」就係咁多騙局。

網民「Cole Cheung」日前喺facebook群組「香港黃色經濟圈」發帖,話自己喺旺角登打士街新開嘅黃店「牧活咖啡餐室」做咗一個半月,形容自己「無遲到無射波。但一蚊都無出過俾(畀)我。」佢話間舖一直唔畀僱傭合約人簽,「一直係咁拖糧,仲話自己係黃店,根本好無良」。「Cole Cheung」話,該店後來聲稱「會分兩期出糧」,但一期都無出過,已經交由勞工處跟進。

員工展「欠單」 資方斥造假

事主仲貼埋「證據」相片,圖中顯示「勞方工作到9月13日,仍有薪金37,000元尚未繳付,並承諾分兩期攤還,雙方立此為據。第一期9月19日付18,500元,第二期9月26日付18,500元」。落款有「牧活咖啡餐室有限公司」的印章。

有網民就懷疑事主所列證據好難幫佢追到薪金。「Shamoon Dhiraj」直言:「張嘢好流,冇寫你工作日期由幾時開始,張欠單冇簽名、冇簽名職位名之餘又冇日期,又冇你身分(份)證號碼,佢話同名同姓嘅人都得。」「Kenndy Wu」都擔心:「乜都冇顯示點追?」有網民直接話件事「同蘋果汁一樣」,暗指呢件事同《蘋果日報》執笠後依然拖欠員工薪金如出一轍。

香港文匯報就事件向「牧活咖啡餐室」查詢,唔方便透露自己姓名嘅「餐室」老闆就話自己已經找清咗條數,件事係「Cole Cheung」捏造,已經就事件報警。佢仲話「Cole Cheung」係前線「手足」,有案底,見佢失業咗一段時間,只可以炒散,見佢可憐於是就請佢。不過,記者問佢有咩證據時,佢就話提供唔到。不過,無論呢件事係邊個講大話都好,都總有最少一方係衰人囉。●香港文匯報記者 藍松山