壹傳媒嘅《蘋果日報》同《壹週刊》相繼玩完，多個黃營媒體亦自行摺埋。其中，網媒《D100》噚日就話佢哋個「VOA新聞天地」即日起改為播音樂，地區媒體《沙燕》則乘勢自爆已經幾個月冇出版，會無限期休刊。網媒《100毛》所屬嘅「毛記葵涌」則有傳會拓展業務搞時裝網購。有網民就質疑「毛記」係身有屎先想轉型，但「毛記」近日都冇就事件作回應。

《D100》新聞轉播音樂

《D100》噚晚發通告，話即日起佢哋個「VOA新聞天地」將暫停播放，會改為「D100音樂播放」，但就冇解釋原因。所謂嘅「VOA」其實就係「美國之音」，點解收得咁急，似乎都唔使講咁明。

冇出版幾個月嘅《沙燕》噚日亦出嚟湊熱鬧，話自己有幾個「身兼要職的手足」因為有案件喺身坐緊監，唔知幾時返，而財政又緊絀，商量過後決定無限期休刊喎。

相比之下，「毛記」就另外搵到潛在財路，諗住同黃店一齊開時裝網購平台，但講開又講，「毛記」唔係第一個搞網購嘅「傳媒」，事關壹傳媒創辦人肥佬黎（黎智英）早喺1999年已搞過直銷店「蘋果速銷」，透過網站同隨《蘋果日報》附送嘅購物指南吸引顧客落單，再送貨上門，但做咗一年多啲就全線執笠，當時肥佬黎仲自爆「蘋果速銷」令佢蝕咗10億港元。唔知「毛記」搞網購又會點呢？

網民質疑「毛記」身有屎

網民「Sa Sa」就搲晒頭：「而（𠵱）家先轉玩網購……」「Chan Ho Lam」就質疑：「可能心（身）有屎，咪嗱嗱臨轉章囉。」

「Kent Wong」就寸埋《蘋果》：「唔好話被逼結業，當大家水深火熱時，大三罷又係你地（哋）搞出黎（嚟），宜（𠵱）家可以永遠罷工！唔係應該好開心？再講，《蘋果》D（啲）員工唔係好有理想同抱負既（嘅）咩？唔收錢都做啦！甘（咁）多手joke（足）都係義工架（㗎）嘛，你地（哋）（仲）好意思收錢？以前甘（咁）多大型集會，全港流膿墻（連儂牆）都係自發又無大檯（台）都能夠搞出黎（嚟），區區幾百人既（嘅）企業要佢繼續運作點會有難度，宜（𠵱）家最缺就係錢，二百幻（萬）人每人10蚊就解決曬（晒）啦！」 ●香港文匯報記者 雨航、藍松山