香港文匯報訊（記者 李思穎）由林盛斌（Bob）、江美儀主持的無綫綜藝節目《Mean Talk》播出以來，每集都向嘉賓們大逼供，而在昨晚播出的集目中，嘉賓請來情同姊妹的蔡思貝、何雁詩及賴慰玲，其間思貝被提到「姣精」稱號，坦言為此不開心，又自爆曾被「問價」，試過最高開價200萬，當然她不為所動。

句句到肉的Bob，直指思貝入行7年共有15單緋聞，談到被封「姣精」，思貝坦承不開心：「始終都唔係讚，但我覺得有原因嘅，頭幾年我真係唔太識（避忌）。」美儀又追問思貝千萬買車買樓等忽然富貴傳聞，賴慰玲、何雁詩即力證思貝是慳慳埋埋才有今天，連阿Bob亦幫口謂：「有次見到佢，嘩！你話晒蔡思貝吖，你不如換過架車，佢嗰架車係CHEAP到拎去劏都未必值三四千。」思貝聞言即忍不住落淚：「有啲人辛酸會公諸於世，我唔係咁，我『懶』係有骨氣。我一路以來無論傳媒講乜，我一次都冇澄清過，我一路專注工作，冇人知道所謂女一是住200呎瞓碌架床。」

在上一集節目，丁子朗意外曝光與心目中女神湯洛雯的一段「關係」。子朗憶述當年拍劇由於不斷NG，遭幕後冷嘲熱諷，湯洛雯見狀即伸出援手謂：「新人係咁㗎喇，佢第一次拍劇咋。」語畢更捉着子朗在廠行了一圈。美儀隨即追問：「點解唔追佢？」子朗「坦白從寬」：「我有約過佢睇戲㗎，但最後冇Physically咁出嚟睇，係Facetime一齊睇，因為有嘢請教佢。」主持再逼供子朗何不直接展開追求，子朗傻氣地表示：「冇幾耐佢就同馬明（馬國明）喇，我唔係追佢心態㗎。」 隨即遭美儀斬釘截鐵反駁：「你唔使兜喇，你九成九想追佢！家輸咗先話冇！」十分搞笑。