唔少黃店食物質素差到離譜幾乎係眾所皆知嘅事實，有啲舖頭就搵打手嚟宣傳，當然沒有好結果啦。有個好鍾意喺fb發表食評嘅網民「Sky Walker」，近日就喺fb群組「食在元朗」猛讚黃店「肥仔海南雞」，結果網民群起批評呢間舖非常難食，仲問點解「Sky Walker」會全部留言都回覆，質疑佢係收咗錢嘅打手。有網民慨嘆，要將間咁難食嘅黃店包裝成一級餐廳，真係辛苦啲打手囉。

形容係「隱世名物」 個個鬧難食

「Sky Walker」喺帖文中講到呢間「肥仔海南雞」幾咁出色，仲形容到間舖係元朗嘅「隱世名物」：「如覺唔鍾意我咁講既（嘅）都冇所謂啦，反正呢間小店每日九點關門前都會賣晒所有野（嘢）。」

呢個post隨即引起大量網民迴響，但絕大部分都係鬧緊呢個舖啲嘢好難食。「陳皮妹」就忍唔住話：「食過真係冇下次，嗌咗個海南雞飯同咖喱牛根腩，海南雞飯加左（咗）雞，但一打開，嘩！加咗雞㗎啦？唔加雞咪仲少，咖喱牛根腩仲衰，得一舊（嚿）un（韌）都咬唔開嘅牛腩，其餘全部都係牛根，一大嚿冇切開，黐住晒，望到都冇食慾啦，咖喱個味係好食嘅，不過真係唔會再食囉！」「Ricky Chan」亦回覆話：「岩（啱）岩（啱）琴（噚）晚食完，真係超一般冇下次。」

眼見「Sky Walker」幾乎每個留言都會回覆，「Kenny So」就覺得好奇怪：「咁熱心回覆既（嘅）？」「Sky Walker」即疑似爆響口：「因為係我開（post）嘛，所以一定信唔過，千奇（祈）唔好去。打手就係要咁做嘛，得閒咪同你地（哋）互動吓囉唔通做緊野（嘢）果（嗰）陣同你玩咩，我就係要幫佢地（哋）去趕客，費事下次去又要排隊。」「Joey mok」就慨嘆：「咁難食都要講到咁好笑，睇嚟你仲辛苦過啲公關！」

●香港文匯報記者 雨航