內地富豪雅居樂地產主席陳卓林，香港馬圈建立「樂」系馬，佢名下「樂滿家」贏過四場，不過家陣已七歲，季內搏來搏去都止於接近，似乎戰鬥力已走下坡，要引入生力軍接棒，而佢太太陸倩芳同囝囝陳思樂，近兩季都先後加入馬主行列，更分別養有「樂滿貫」同「樂盈盈」，為呢系馬增添兵力，呢兩駒都係由告東尼訓練，「樂盈盈」早前已由郭能贏馬建功，今次就輪到「樂滿貫」接棒。「樂滿貫」在澳洲兩出兩勝，贏一千及千二米，來港之後出道跑七次越跑越近傍，之前更俾落飛黨狙擊，近兩場田草一再留後試準追勁，今次重返曾上名谷草千二米，相信係落飛黨追數時候。