若行事光明磊落就唔驚會被清算,甚至驚到辭職並疑似走佬去外國。講緊嘅係攬炒派新民主同盟西貢區議員黎銘澤,佢日前被傳出好耐無蒲頭,疑似驚因為有參加違法「初選」而先走一步去咗英國,點知傳下傳下佢噚日就喺facebook發文,正式宣布會辭去區議員一職同退出新民主同盟,聲稱係由於區議員要宣誓一事,但事實上係點,大家心照啦。

話說《東網》之前引述消息指,早前有傳黎銘澤已長時間冇出席區議會會議,被質疑已離開香港,最新消息證實黎銘澤早喺上月初已經靜雞雞離開香港,現身處英國。報道又指,外界盛傳係因為黎銘澤早前曾經參與違法「初選」,名列新界東「初選」名單之中,且公開為黨友范國威助選,𠵱家范國威被捕還柙,所以黎銘澤擔心「殺到埋身」,或成為下一批被捕者,就率先離開香港以保安全,但暫時未知佢家人係咪跟隨離港。

屈宣誓「竊取區選結果」

面對坊間議論紛紛,黎銘澤一直都唔蒲頭正面回應事件,但終於喺噚日發文宣布會辭去區議員一職同退出新民主同盟,原因係佢唔想宣誓,聲稱今次宣誓係要「明目張膽竊取2019年選舉結果」,「是在每位民選議員頸上架起一把刀」,所以佢考慮自身情況,認為自己可以承擔失去區議員一職嘅代價,決定成為站出來說「不」的人,講到自己好有承擔咁嘅樣。

雖然黎銘澤講到自己鬼咁「正義」,但軍寶社區發展主任黃煒龍睇唔過眼,噚日亦發表聲明要求黎銘澤向軍寶區居民交代佢喺辭職前係咪已經離開香港,又踢爆根據西貢區議會記錄,黎銘澤由3月2日起多次缺席西貢區議會會議,並以另有公務為由請假,叫黎銘澤嗱嗱臨交代每次缺席是因乜嘢公務,定係以虛假理由請假,事實上已離開香港。

黃煒龍諷黎疏於區務

黃煒龍更潤多黎銘澤一句,話佢同一眾軍寶區居民遺憾黎銘澤過去5年議員生涯疏於區務,但佢本人將繼續用心服務軍寶區。一諗到黎銘澤會被激到扎扎跳,但又唔敢出聲嗰吓真係好好笑。

雖然黎銘澤冇回應係咪已經走佬去英國,但都仲有網民仍然盲撐,「Betty Sun」話「我記得Jacky係『初選』其中一位參選者嚟架(㗎)喎……不如去外國好過啦。」

好彩,都有網民質疑佢係心虛想走人,「Toby Teng」認為「大魚溜走,蝦毛蟹仔當然不甘後人!」「Kimkong Bau」揶揄「唔想被捕,唯有避捕。」

●香港文匯報記者 郭家好