中秋佳節，攬炒派都要扮吓嘢派月餅，但民主黨屯門區議員陳樹英咁都有得攞嚟瘀，被人揭發近日派畀街坊嘅月餅係發霉嘅。身為派嗰個，陳樹英就講到自己冇責任嘅，淨係話會追究賣畀佢嘅店家喎。唔少人都質疑，萬一有人唔覺意食咗中毒，陳樹英係咪即係唔會負責任呢？

街坊投訴：好多月餅都發霉

陳樹英區議員辦事處此前喺區內一家餅家買入據稱係自家製的「迷你奶黃月」，並喺9月21日開始派發予「兆康松柏會」長者會員，但有街坊就投訴，發現自己攞嗰盒已經發霉，連鄰居嗰個都係。「我諗你地（哋）要通知其他住戶，可能好多月餅都發霉，老人家小朋友食咗就唔好。」

大概收到好多投訴，陳樹英就喺fb發帖「道歉」，話懷疑賣月餅畀佢哋嗰間餅店出售過期月餅，又承諾會即時更換「質素仍然良好」嘅月餅畀街坊外，同埋向該餅店投訴，及將轉介事件予食環署調查。

張偉楠揶揄扮唔關自己事

民建聯南區社區幹事、「議會監察」成員張偉楠喺轉發呢單消息時揶揄：「俾人踢爆向長者派發霉月餅，就嗱嗱聲話要向涉事餅店投訴，扮晒唔關自己事咁，推得一乾二淨。月餅經你手派，唔係有事扮無事呀！食壞人點樣算？！」

民建聯中西區支部委員、另一「議會監察」成員劉天正轉發fb專頁「南區時政台」嘅評論：「適逢立會去留民調如火如荼之際，民主黨係咪想用月餅收買民調支持度呢？不過好心咪用陳年月餅啦，派左（咗）咁多年手勢都咁差～提醒下各位，同一批月餅通常用同一批材料，而（）家有月餅壞左（咗），可以合理推斷你收到個份可能已經壞左（咗），只係表面上睇唔到炸（咋），收到民主黨嘅中秋禮物要小心為上呀～」

唔少網民就鬧爆陳樹英。「Weng You」話：「長者眼朦朦（矇矇）睇唔見發霉，吃左（咗）疴（屙）到出現併發症就會出人命，絕非小事。」「Kc Lee」亦話：「俾（畀）大家舊年食剩月餅，平啲呀！唔好派啦！想害老人家，心毒！」「Joe Kam」更陰謀論地「靠估」：「用高價買平價折扣貨，然後出公數問政府取回正貨價值，一來一回將折扣落自己口袋。」 ■香港文匯報記者 陳川