龍門真係負面新聞磁石，買月餅券俾人投訴收唔到貨已經係小兒科，有網民噚晚喺fb度指控，話「龍門」嘅月餅「疑似」係喺無牌工場製造，叫食環署人員盡快調查喎。

經常「反偽黃」嘅「Anita Wong」喺fb發帖，話龍門冰室/瓏門冰室啲月餅「疑似」全部都係非法製造，地點就係佢個前資源中心嘅office，「饅頭張（龍門老闆張俊傑）六月就將幾部焗爐搬上紅磡office，……响（響）嗰度非法整餅。良心老細良心月餅？零衞生規格嘅無牌食品，同『大陸黑心食品』有乜分別？真係食壞人都唔知咩事！」

號召網民向食環署舉報

佢號召網民用1823向食環舉報，「愈多人打去，食環會愈快做嘢。記得話係無牌月餅工場，中秋前一定要做嘢，叫食環落urgent case。餅房而（）家趕工中，應該正常時間都有人，午飯後時間肯定都開嘅。」

「Anita Wong」仲向張俊傑挑機：「饅頭張，如果你想話我老屈你，咁請你公開龍門月餅工場嘅食環牌照、消防證書。 龍門月餅工場係（喺）六月已經開始運作， 牌照同證書應該由六月就開始㗎啦，記得show埋工場名稱、地址、牌照號碼，以便大家向食環查詢呀！」

佢又形容現在係「饅頭張の兩難局面」：「唔開工的話，本周攞月餅高峰期就冇五仁月餅同抹茶紅豆月餅俾（畀）客；開工的話，又驚食環上去冚佢檔無牌餅房。總結：開又死唔開又死。」

「Katie Tam」留言道：「無得攞月餅要即刻飛奔去補獲（鑊），依（）家被指責冇牌月餅工埸，快啲貼你個牌出黎（嚟）大巴大巴打落anita wong到（度）啦！」「Walter Cheung」仲「扮」龍粉嚟寸佢哋：「『大把藍店仲×街啦，搞黃店就咁落力！』『我食到肚痛痛（都無）乜所謂，我係食理念嫁（㗎）嘛』『搞死龍門咪大家齊齊食番（返）美心囉。』」「Sam Ng」亦話：「反正烘燶同裂都可以交比（畀）人，是但搵間工場咪得囉…反正龍粉唔會介意。」

■香港文匯報記者 陳川