換餅無貨被寸一肚氣 龍粉話你搞分化

現兜兜畀晒錢買月餅券，約埋時間去攞攞唔到，仲要俾個職員寸，咁嘅服務態度真係唔得㗎，但如果係「黃店」就例外囉，投訴吓都話你搞分化。有「連登仔」近日投訴話特登喺「龍門冰室」買月餅券，結果拎餅嗰陣對方話畀佢聽佢要嗰款無晒，叫佢一係退錢一係拎第二種，仲用月餅券啲所謂「免責條款」去大佢，搞到佢上網投訴。當然啦，一投訴，就有龍粉話佢特登搞大件事，但原來唔少黃絲都有過咁嘅遭遇，仲唔單止「龍門」一家。

■香港文匯報記者 陳川

網民「廢john三世」喺「連登」度開帖，話自己平時最撐龍門，所以今次中秋節特登喺對方度買五仁月餅，點知佢攞張月餅券去攞貨時，對方就同佢講全線冇晒五仁月，仲想叫佢拎第二盒就算。

佢即刻WhatsApp返龍門賣月餅嗰個人，「佢話一係退錢一係拎第二隻味，仲用張劵（券）d（啲）條款大我，做生意講信用，最緊要就係老實，…龍門冇晒貨又唔通知持劵（券）人（我係上網訂，有記錄㗎喎），我訂個（嗰）時又唔見你個網有寫條款？…一早比（畀）晒錢訂野（嘢）真係把×，一句冇貨就想打發人…」

已經被鬧慣嘅「龍門」隨即出post話「180度鞠躬道歉」，認話係「龍門客戶服務真係做得奇差」，同時向負責月餅銷售嘅部門「問責」，然後形容位負責嘅同事係「小朋友」，對方問點樣補救喎，結果就係call的士送返份五仁月餅畀個投訴人，仲送多份白蓮蓉月餅喎。

龍粉護主網民翻舊賬

但同時，就有唔少龍粉即刻撲出嚟鬧投訴人。「Jan Jan」話：「唔明點解有啲人總要小事化大。」「Greta Tsui」稱：「我寧願攞唔到嗰個係我，因為我唔會周圍講。」「Chester Chan Chi Wai」則曲直難分地道：「唔緊要喎，龍門做乜都畀人鬧架（㗎）喇。又睇下今次認錯會有乜畀人插先。」

有龍粉就話攞貨唔係隨攞隨有嚟鬧個投訴人，「Doug Doug」就抵唔住頸：「訂既（嘅）時候已經要揀定日子同邊間分店取貨（唔可以改時間），所以冇理由會預唔到貨俾（畀）人。如果你話拎住張卷（券），張卷（券）係可以去任何一間舖換任何口味既（嘅）就話預唔到啫，所以今次冇貨俾（畀）人，點都係有責任。」

「Jack Lau」就似乎有舊怨咁鬧：「你地（哋）之前賣糉賣年糕一樣衰過呢啲嘢啦，內部無開E會架（㗎）咩？仲要去屈個CS係小朋友？…難得你班支持者咁唔計較，你地（哋）mark實晒邊款月餅邊日邊間舖拎，無貨拎都覺得無問題。掉轉要你地（哋）預早講定邊款其實係無貨係咪咁難？賣得貨呢啲只係負返基本責任下嘛？」

「Wong Chung Eva」亦話：「我上次去尖沙咀攞糭都有同樣嘅問題發生，竟然話冇糭，其實賣出左（咗）幾多卷（券），就應該預定數量啦，又唔係叫你整多，但冇可能冇（得）囉！整夠數時，呢間冇晒，至少可以係（喺）第二間攞，唔好要求人地（哋）換第二款，做生意唔係咁！」「Stephanie Chan」回應：「我上次去尖沙咀攞糉都係同你一樣遭遇，再之前攞年糕又有少（小）插曲，今次月餅我冇幫襯龍門了…」

攞人哋條裙 冚龍門隻腳

講吓講吓，燒到其他黃店嗰疊。「Wu Han Fai Yin」話：「（龍門）算好了，好多黃店⋯⋯」「Gigi Lau」就用自己朋友嘅親身經歷，攞人哋條裙來冚龍門隻腳：「其他所謂黃店，喺指定提取日子里（裏）Total白行咗3次，都依然拎唔到餅，佢真係火都嚟埋。」「HK Audrey」亦呻：「我訂了另一間黃店，收貨時2個盒都爆開爛了，佢叫我如果要送俾（畀）人，自行用萬能膠黏返。其中一盒送錯貨，佢有搵人換返我原本訂的貨俾（畀）我，但只用個透明膠袋裝住幾個散裝月餅，連盒都冇…所以覺得龍門今次都算有承擔，當然仍有很大的改善空間。」