被「同路人」排擠應該點算？問吓攬炒派嘅深水埗區議員黃傑朗啦。話說今屆多區區議會都俾「素人」把持，結果唔止建制派議員被針對，連傳統「飯民」議員都被孤立，但深水埗區議會就啱啱相反，身為「素人」嘅黃傑朗日前仲喺facebook呻，話佢嗰區啲議員「又保守又落後」，特別係正、副主席幾乎唔交代佢哋喺「十七區民主正副主席聯絡會議」嘅內容，令深水埗區議會好似脫晒節咁；又話呢啲主席唔識主持會議，令佢呢啲「『本土派』年青（輕）議員」有志難伸喎。其實大家都係「同路人」啫，又使乜分到咁細呢？

深水埗區議會多年嚟都係民協嘅根據地，今屆25席裏面，民協、民主黨同公民黨已佔咗逾六成議席。除咗建制派議員，剩低幾個報稱獨立嘅議員，其實都係傳統「飯民」政黨嘅前成員，好似目前深水埗區議會副主席伍月蘭就係公民黨嘅前成員，區議會主席就由身為民協副主席嘅楊彧擔任。

但就算係「同路人」，地盤裏面都總會分莊閒。黃傑朗近日就喺fb「孤芳自賞」，話佢同另一黨友冼錦豪早就將自己定位做少數派，事關佢哋人丁單薄，無辦法撼得贏嗰班咁保守嘅「同路人」。黃傑朗又慨嘆，到咗今時今日都仲有「同路人」建議同警方聯名「雪糕筒」解決違泊問題，真係「夠晒荒謬」。

批正副主席唔識開會

眼見其他由「素人」主導嘅區議會搞咗咁多「改革」，黃傑朗就將矛頭指向楊彧同伍月蘭，話佢哋嘅會議安排混亂，喺接納臨時動議同調議程方面好似毫無準則，又唔交代佢哋同其他區議員正、副主席嘅會議內容，搞到變咗各家自掃門前雪咁款，真係愈睇愈失望喎：「作為一個希望改革的『本土派』年青（輕）議員，面對如斯保守的議會豈能不唏噓嗎？」、「深夜一個人，問誰明白我？」

其實講到尾，黃傑朗都係想搵班真正嘅「同路人」圍爐啫。油尖旺區議員李傲然就如佢所願，話黃傑朗「慘」。元朗區議員王百羽就轉發有關帖文，但就乜都冇講。

雖然其他區嘅「素人」似乎唔想理黃傑朗，但都有幾位網民可憐佢，好似「Agnes Siu」就話：「你仲唔明人哋嘅準則？自己人咪乜都得，你唔係佢哋嘅人梗係乜都唔得啦！」「Kenny Fung」就寸佢：「好似其他區議會都冇乜人理你？」 ■香港文匯報記者 鄭治祖