鄺士山土法驗罩稱無熔噴布 被追究即鬼祟改帖話係冒牌

「黃化學專家」鄺士山嘅發展領域從補習社到亂噏催淚彈有污染環境嘅二噁英再到徒手驗口罩，成功實現「人生三連跳」，晉升為「黃絲」KOL。佢近排喺facebook狙擊兩個台灣品牌口罩質量有問題，搞到啲「黃絲」以為自己中咗伏，對方即刻企硬話要追究佢法律責任。鄺士山就靜雞雞將個post改成打擊相關口罩假貨，再投訴對方控告自己呢個幫手搵到假貨嘅人。不過，啲台灣廠商根本唔收貨，睇個勢都要追究到底。■香港文匯報記者 文根茂

曾經號稱「唔用手指，只用眼睇已經分到meltblown（熔噴）質素」嘅驗罩「大神」鄺士山，本月13日喺facebook點名批評台灣兩款3D口罩Easy-O-Fit及SOLIS抗疫功效存疑，「收到一堆冇Cert嘅『台灣3D』口罩，3層都冇熔噴布，全部SMS布。最離譜係3層只係中間部份（分）有，大部份（分）呼吸可以由耳帶布出入。」當時，好多迷信鄺士山嘅「黃絲」都以為自己中咗伏。

台廠寸鄺測試方法唔科學

被點名嘅SOLIS公司即刻發出公開聲明，話自己口罩質量過硬，寫明國際及台灣各式檢測結果，仲唔點名寸鄺士山「對於某些網路及自稱為專家的人是如何測試證明本公司口罩之質量不能防菌？請這些人用專業及科學的方法檢測本公司的口罩，不要再胡亂用坊間非科學的方法測試而誤導市民並藉此誣蔑（衊）本公司之產品」，仲表明話保留追究權利。

有趣嘅係，SOLIS篇聲明喺本月14號晚7點左右發出，香港文匯報記者翻查鄺士山話人哋口罩有問題個post嘅編輯記錄發現，同日夜晚10點左右被添加咗「寫住台灣製（但我見果（嗰）D（啲）台灣製盒唔係咁，有可能係假貨！）」嘅內容落去。

之後，鄺士山就轉風向去「打假」嘞，出post話自己又驗到相關品牌嘅「假台灣貨」。但疑似係台灣Easy-O-Fit原廠嘅人就喺相關post下逐條留言，話由於鄺士山嘅不實檢測與材質報告，對佢哋公司造成商譽上的影響，集團決定委任香港律師告佢。當晚，鄺士山又出post話已收到「正貨」：「等等！每隻手驗要半小時，……好快會有真台灣貨報告。」

一日之後，未見報告，反而見到鄺士山轉發幾日前嘅SOLIS公司聲明，繼續叫大家「購貨請買台灣正版」，疑似想求和。

不過，SOLIS就唔收貨，當日就喺facebook直接點名鄺士山，「我們根本沒有所謂的假貨喔」，「k kwong（鄺士山）號稱他拿到的貨是假貨，這是他單方面的說法，因為他測試的機台不具公信力，測試方式也有問題。」SOLIS又話同緊香港律師研究對策，好快會提告。

鄺自稱幫手打假圖甩身

之後，鄺士山變成打悲情牌，留言畀啲台灣口罩商話：「我同你搵到假貨，你告我？」「我同正版Solis同Easy o fit 嘅廠一樣，好想找假貨出來」，仲不斷攻擊質疑佢嘅人。

網民似乎都唔想幫鄺士山。「Kungtzi Ma」話：「咁有信心話人哋唔合規格，人哋出聲就話自己買到佢假貨。閃得快過閃電。」「Anna Su」覺得：「不知道為什麼風向會被一個徒手玩口罩的人帶成這樣。」