為了爭食人血饅頭,「黃色經濟圈」經常鬼打鬼,備受《蘋果日報》「寵愛」的龍門冰室老闆張俊傑(饅頭張)更成為眾矢之的。唔少「黃絲」控訴佢啲嘢難食不特止,仲「呃手足」、專搵「自己人」笨,而以渣哥為首嘅其他黃店,所謂「渣家軍」更加日鬧夜鬧,講到底,都係為爭「黃店龍頭」個位,做多啲生意啫。大家都係食人血饅頭啫,真係「相煎何太急」?龍門最近就策動反擊,唔單只控告一個公開「誹謗」佢、得到「渣家軍」支持嘅「手足」,仲有一股以龍粉為主嘅勢力開咗個「渣家軍人西炒車事件簿」,以一打眾,逐個狂插曾經與佢哋有過恩怨嘅「黃店」、「手足」,個狙擊力度都幾有攬炒意味。唔同陣營鬥打負分戰,確係體現咗佢哋口中「攬炒」嘅精髓,大家可以齊齊坐定定食花生,睇黃圈自己點樣攬炒自己嘞。 ■香港文匯報記者 文根茂

鬥數人血分店 互咬刷存在感

喺「黃圈」參與是非,如果唔係為錢,唔通真係為咗公義?「渣家軍人西炒車事件簿」成員日前就開post幫龍門洗白,話龍門多開咗兩間分店就要被鬧食「人血饅頭」,而「黃店」渣哥、光榮各個都唔止開咁多啦,水門雞老闆仲要賣雞賣到發達,仲玩開車。唔理個「人血饅頭」佢哋究竟點分,睇來藉狗咬狗提高知名度都幾易賺嘅,所以龍粉唔係家幫龍門繼續咬咯。

「Siu Man Chan」日前就喺「渣家軍人西炒車事件簿」群組幫口龍門:「成日話龍門開分店係人血,其實都係開咗兩間啫。」「渣狗(哥)兩間:九龍灣(1/2)、銅鑼灣(籌備中);光榮(光榮冰室)4間:花園街(21/1)、 深井(重新裝修一分為二)(22/6)、觀塘(25/6)、銅鑼灣(1/8);水門雞(水門雞泰式海南雞飯專門店)2間:屯門(4/6)、尖沙咀(18/8);基隆(基隆茶餐廳)1間:深水埗(28/3)」質問「咁佢哋呢啲算唔算人血?」

順便鬧渣哥偷食假公投

佢仲不懷好意咁翻炒渣哥黑歷史,貼出渣哥之前被爆瞞住老婆譚小環多次「偷食」,同埋刪除咗嘅「公投」決定新舖位post。事緣渣哥原本學人搞「公投」話要決定新舖位置,點知無啦啦加插咗董事投票佔五成嘅環節,最終逆民意喺最少網民投票嘅地區開舖,結果當然俾網民炮轟內定結果扮民主,件事喺當時引起唔小嘅風波。

水門雞老闆玩車都被佢寸:「賣雞除咗可以謀生,賣雞亦都可以致富,賣雞賣到變出彩虹。」開得呢個群組,龍粉都識做啦。「Anita Red」揶揄「水門×真係教識大家做雞有幾好」。「Andy McEveley」都幫腔:「佢D(啲)雞求其斬兩舊(嚿)賣你四十蚊,發達。」「Stratys Lau」就質疑:「一開始人渣就唔抵得龍門做到有聲有色,成日單單打打,根本就係妒忌」。不過,「Chris Yuen」就似乎唔明龍粉嘅邏輯:「佢自己賺錢買玩具開分店就天公地道,人地賺錢就人血係咩道理。」

被挖掠水前科 楊朗即變巨嬰

啱嘅,你就係「手足」,唔啱嘅,你嘅人格就當然有問題。曾經聲稱同「手足」親如一家嘅龍門日前要控告「手足」楊朗,喺「渣家軍人西炒車事件簿」立誓要捍衛龍門嘅龍粉就各種揭發楊朗黑歷史,斷言佢人格有問題,仲揶揄佢係27歲嘅巨嬰,擺明想叫啲聖母「家長」睇清楚楊朗係問題「手足」,唔好同情佢,要大家都同「手足」割席。

楊朗曾經係「饅頭張」創立嘅「香港人嘅冰室資源中心」前手工藝室主管。早前,「饅頭張」因楊朗嘅言論而告佢誹謗,而因楊朗同時因涉嫌暴動罪而被控告,搞到原本就聲名狼藉「饅頭張」落得個告「手足」嘅罪名,更加人人喊打。不過,之後因為楊朗被質疑喺太古城片皮鴨團購中「呃」運費而令輿論風向開始轉變。

龍粉呢兩日就繼續炒作「呃」運費事件,鬧返楊朗係「饅頭楊」,仲要重炒「饅頭張」曾經公開嘅同楊朗嘅聊天記錄,想話佢之前都想賺差價,睇嚟係想話畀大家知個人嘅品性有問題,講嘅嘢唔信得。

「渣家軍人西炒車事件簿」成員「Yan Wong」就話楊朗「搞團購唔係唔俾你袋,街坊只係話你冇講明你會袋,騙案穿咗仲要搵人西護駕鬧人乞兒」、「用偷返嚟嘅聖誕咭(卡)出書,食人血饅頭」,仲用埋「饅頭張」對楊朗嘅指控,話佢「教『手足』聚賭」、「人格有問題已經鐵證如山」。佢哋仲揶揄件事係「marco(楊朗)囝歷險記」,設計對白話「渣家軍」話:「屈×饅頭張就得,我會捧你做27歲巨嬰,香港人好×蠢㗎咋,你有暴動罪就可以為所欲為。」「Net Fai」話「狗改變不了食屎。」「Stratys Lau」話「其實佢光明正大話畀人聽,會有額外運輸費去幫手足,啲人一定會支持……但佢又唔講清楚」,又幫埋龍門「總之龍門都係戇×,惹埋呢啲狗屎垃圾,不知名嘅×樣害到佢雞毛鴨血……」

趙家賢亂作保 出事閃電割席

好笑嘅係,攬炒派區議員趙家賢都幾醒下,識得根據輿論風向跳入跳出,之前大批人鬧龍門告「手足」時,佢就話話自己多次同協助「黃店」告急嘅楊朗聯絡,肯定對方係真「手足」喎,但楊朗太古城團購賴嘢後,趙家賢又極力割席,力申自己雖然宣傳嘅活動,但「不涉及任何金錢來往、即時或延後之利益」。啲人就連趙家賢都鬧埋,「Lomiko Yip」話:「趙家賢份人係咁,我識得佢都係咁話。」

「黃圈」啲人際關係真係好複雜,成日人又係佢哋,鬼又係佢哋,不過啲情況出現喺「黃圈」就唔出奇啦。

龍門理大做騷 渣哥歎住眼紅

「黃圈」成日好忙,忙於插嚟插去。早前因告「手足」而進一步成為「黃圈」公敵嘅「饅頭張」早前就被「渣家軍」嘅「黃店」圍攻吊打,好彩一人一句都仲未淹死佢。擒賊先擒王,今次龍粉睇準機會,就揭發成日話「龍門張」入理大都係做騷嘅渣哥,當時人卻去緊旅行,揶揄佢根本係眼紅嘅鍵盤俠。

除咗「渣家軍」龍頭渣哥,喺理大暴動時就鬧「饅頭張」係做騷外,日前「渣家軍」嘅「水門泰式海南雞飯專門店」都以「家政堂的一天」為題,大爆「饅頭張」喺理大被暴徒佔領後鏡頭前後嘅表現,「水門雞」憶述,當其他大佬級廚師密密煮飯時,「唔×知邊×個記者(網上截圖顯示為《蘋果日報》記者)細細聲講,『唔好意思,可唔可以借個位比(畀)張生,佢黎(嚟)教學生煮飯』……個×街同隊crew(攝影隊)影×完相D(啲)野(嘢)掉×返係(喺)到(度)就走×左(咗)去。」

「黃店」「新景園咖喱小廚」都發帖話:「再重申多一次,支持告『手足』誹謗嘅人……新景園唔歡迎你地(哋)!」「陸陸雞煲火鍋」都踩多一腳:「成×日話幫年輕人?幫條×呀……如果你仲支持個加害『手足』嘅人,唔好意思,麻煩你過住(主)啦。」「光榮冰室」就發帖講:「本是同路人,相煎何太急。」

龍粉寸渣軍齋敲鍵盤

向來做嘢有手段嘅龍門一派,當然識得擒賊先擒王嘅道理。有人就喺「渣家軍人西炒車事件簿」狙擊渣哥,開post話「饅頭張」當其時係「冒住被告暴動危險入理大」,而從佢po嘅相睇,渣哥喺10月底嘅時候去咗旅行成個月,「輕輕鬆鬆做鍵盤戰士,全香港打緊仗你有乜貢獻?」

「渣家軍人西炒車事件簿」成員「Siu Man Chan」都揶揄渣哥「渣狗(哥)唔妥龍門係人都知,其實舊年已經有跡可尋,鬥黃店龍頭唔係浪得虛名。」仲要講返話「入理大都唔係黃、×走藍屍唔係黃、派水派物資唔係黃、派學生餐一定唔係黃啦。」

網民「Yan Wong」都幫腔:「自從龍門上年出咗位,渣哥已經喺開始自己私人Account不停單單打打……依()家仲要delete晒啲留言。」

你話我做騷,我話你眼紅,各個都言之鑿鑿,唔通佢哋兩邊攻擊對方嘅話都有啲道理呢?

食「廚房佬」血饅 先眾籌後混賬

錢錢錢,又係錢。龍門因錢而與人生嫌隙,「渣家軍人西炒車事件簿」都識得用「錢」來搵對方漏洞,個群組就有人開post要光榮冰室交代捐款明細同去向,仲貼出個似是而非嘅對話截圖,搞到啲人睇到都想入非非。

「Yan Wong」喺個群組「渣家軍人西炒車事件簿」開post要求光榮冰室交代「廚房佬聖誕大餐」等捐款明細,話「你鋪(舖)頭個超大捐款箱咁耐以嚟收嘅捐款一定唔少過龍門」,仲聲稱「你當日穿櫃桶底個admin話,你旺角間光榮同茶半,重(仲)有觀塘銅鑼灣間光榮都係用如水啲捐款開」揶揄「你幾時學你大佬渣哥話齋搵個有公信力嘅人公開條數?」

廚房佬寄「光榮」籬下講不出聲

佢提到嘅係光榮冰室舊年聖誕節搞嘅「光榮冰室×理大廚房佬」活動,請個喺理大暴動中出名嘅廚房佬「Sunny Zie」喺光榮做聖誕大餐,當日店內就擺個貼士箱等啲客自由定價,光榮聲稱所得款項「不扣除任何成本,一半捐予相關團體,一半則交到廚房佬基金,用作下次再開餐」。

當活動完咗翌日,光榮有喺facebook開post,「昨日活動所得收益在不扣除成本下(六位數字)已交到廚房佬手上,在此我代他感謝全香港人」,而「Sunny Zie 」就轉發留言話「已經從光榮冰室老闆手上收到十萬元正(整)」。

不過,「Yan Wong」就po咗張聊天記錄相,入面疑似係廚房佬「Sunny Zie」同一位佢支持者嘅對話,個支持者話自己「聽到光榮會將貼士箱的善款全數給你,我放下了一萬完(元)」,想問下個廚房佬收唔收到,但就見「Sunny Zie」話「我只能說收到一部分」,仲叫個支持者「不要追究」,話「地方也是人家的」。

「Yan Wong」都有提到嘅光榮搞嘅「The Vision」「救助弱勢計劃」,要求佢哋交代,不過翻查光榮嘅facebook post,其實佢哋三月份有講「第一期報告」,提到合作機構同人,已經獲捐物資,而「Yan Wong」個post就完全未提呢回事。

「渣家軍人西炒車事件簿」管理員「Man Leung」仲喺群組po出一疊相,話「光榮美食巡禮,廁所放臘味,同路人食到津津有味」「光榮屎坑配一丁,對同路人真有情」「衛(衞)生情況惡劣,同路人就係要食屎,光榮仲要扮無事」。睇嚟龍粉想搞臭光榮嘅攻勢都幾猛吓。