【粵語講呢啲】生命不在乎得到什麼，只在乎做過什麼；黄家駒這句話生成的過程
梁振輝 香港資深出版人
1990年8月3號至6號，Beyond主音歌手黃家駒、極地探險家李樂詩、香港小姐冠軍張瑪莉等熱心公益人士，跟隨由「宣明會」牽頭、香港電台協辦嘅「愛心第一旅」，遠赴巴布亞新幾內亞作親善訪問。
巴布亞新幾內亞係太平洋西南部嘅一個島國，西鄰印尼，南部同澳洲隔海相對，由香港直飛大約9個鐘頭。可能因為當地人嘅皮膚以黑色為主，近年唔少網絡新聞都誤將呢次出訪，講成Beyond初探非洲之旅。
呢次訪問，家駒去過貧民區、學校、醫院等地方。巴布亞新幾內亞嘅歷史充斥住殖民主義同偏見，直至1975年先至正式獨立，獨立之後依然不斷有大大小小嘅衝突。家駒今次就親眼睇到當地人民嘅苦況，從而激起佢對生命意義作出深層嘅反思。同年3月14號，推動反種族隔離主義嘅南非黑人人權領袖曼德拉獲無條件䆁放出獄。佢係畀南非法院判處「密謀推翻政府」等罪名，而前前後後坐咗26年半監。呢次出獄象徵咗一次不惜失去自由代價，成功實踐一個崇高理想嘅勝利。
從巴布亞新幾內亞返到香港之後，家駒喺報紙上睇到曼德拉呢段因為爭取人權而長年被囚禁嘅故事。家駒覺得佢喺事件上嘅精神內涵，同Beyond一直艱辛打拼嘅理念不謀而合，再諗返自己同Beyond由跌跌撞撞，至今日事業有成嘅歲月，就好感慨咁講：
生命不在乎得到什麼，只在乎做過什麼。
（Life is not about what you achieve, it's just about what you have done.）
1990年9月，Beyond喺專輯《命運派對》裏頭收錄咗日後被奉為神作嘅《光輝歲月》，以歌頌曼德拉呢位黑人人權領袖一生為消除南非種族歧視、為實現民主自由社會所作出嘅貢獻。就讓我哋重溫一下《光輝歲月》裏頭一啲展現人性光輝嘅片段：黑色肌膚給他的意義，是一生奉獻，膚色鬥爭中；今天只有殘留的軀殼，迎接光輝歲月，風雨中抱緊自由；一生經過徬徨的掙扎，自信可改變未來，問誰又能做到。
1993年6月24號，家駒不幸喺日本錄製電視遊戲節目嗰陣發生意外，最終不治離世。喺佢個墓碑前放置咗一本書，上面就係刻咗佢曾經講嗰句：
生命不在乎得到什麼，只在乎做過什麼。
由呢時開始，家駒嘅忠粉就將呢句話奉為金句，有人仲當咗係所謂「黃家駒精神」嘅重要信條之一。多年嚟，識得嗌呢句嘢嘅人唔少，真正明白箇中意義或者付諸實行嘅人又有幾多，大家應該心中有數。
