【貴圈真亂】光時網購高層扮減薪續自肥
被爆人工10萬變7萬加花紅 網民質問：生意差照出？
聲稱要將所有資源留畀「手足」嘅網購平台「光時」，日前被爆肥上瘦下，管理層10萬高薪佔咗四成人工，但另一邊就裁緊兼職人手，令「手足」冇工開。有見群情洶湧，「光時」前日再出聲明，將件事講成係想「建構可持續發展嘅網購平台」喎，仲話要「保護員工」，唔可以公開數字細節。唔少「黃絲」今次就唔上當啦，質問「光時」︰「管理層公開自己人工同承諾會減人工有幾難？點解仲要傾？定係有人留戀人工唔肯減？」■香港文匯報記者
甘瑜
標榜自己係「黃店」就有「黃水魚」上釣，又難怪有啲人會食大個胃口嘅。「光時」日前被爆4個代號P、K、O、B嘅管理層，突然由「義工身份」變成受薪員工，其中阿P薪金仲加倍，由失業前嘅四五萬，一下變成要價10萬蚊，有內鬼就揚咗件事出去，同呢班肥上瘦下嘅管理層攬炒。
辯稱「保護員工」拒交數簿
一度唔肯認衰，發千字文維護阿P值呢個價嘅「光時」，前晚再出聲明講對唔住，話「管理模式」的確有問題，會「檢視同解決」，兼盡快公布同全體員工討論所得嘅共識喎。佢哋仲講明，今日嘅「光時」個個出緊糧，大家係想「建構可持續發展嘅網購平台」，仲話唔公開數字細節係「保護員工」嘅「基本責任」喎。
不過唔少「黃絲」都唔再受呢套，狠批「光時」講廢話。網民「為貪嗔喜惡怒著迷」就喺連登討論區出post話︰「其實大家最concern（關注）就係公司未賺大錢，仲要cut（削減）緊part-time（兼職）人手，但竟然仲有人出十萬糧比（畀）自己！」
佢仲問︰「管理層公開自己人工同承諾會減人工有幾難？點解仲要傾？定係有人留戀人工唔肯減？……請管理層記住，『光時』唔係一間普通私人企業咁簡單，唔係因為你地（哋）做得好所以大家幫襯，係因為當初你地（哋）承諾要幫手足，每分營利都要去支援社運，所以先有咁多人願意課金比（畀）你地（哋）。」
「Bernard Chan」亦喺「光時」個facebook度留言，揶揄「光時」竟然厚面皮話自己「初心不變」，「係咪盈利仲係打算支援社運，但係出完糧之後無盈利，所以無辦法支援社運？」
網民恐「禮物卡」將變廢紙
話同全體員工傾，咁又傾成點先？網民「五味冰火」噚晚喺連登出post爆料，話「光時」噚日開完大會，「高層每個月出7萬底薪加bonus（花紅）」。佢仲貼出疑似「光時」中人嘅留言，話「寧願快d（啲）燒完舊（嚿）錢，都唔想再減人工」，叫啲幫襯「光時」買咗好多「禮物卡」嘅人自己睇路。有網民即刻留言︰「得，明哂（晒），有得用好快啲用，遲下（吓）變廢紙。」
「絲吉b」就反問︰「Bonus係咪生意差都照出？咁同月薪10萬有咩分別？」「加速師」狠批阿P「賴死唔走」，揚言要杯葛「光時」︰「真係可以疊埋心水幫襯其他。」
有啲「黃絲」就心傷緊呢單嘢又會俾「藍絲」恥笑，言外之意似乎想當冇事。「天祐香港人」就忍唔住話︰「唔通為左（咗）唔俾人恥笑由佢一路cap（掠）水cap到尾？」
